ਜਾਨੀਆ ਚਾਹਲ ’ਚ ਕਿਸਾਨਾਂ ਦੀਆਂ ਜ਼ਮੀਨਾਂ ਪੱਧਰੀਆਂ ਕਰਨ ਦਾ ਕੰਮ ਜੰਗੀ ਪੱਧਰ ’ਤੇ ਜਾਰੀ

ਸੰਤ ਸੀਚੇਵਾਲ ਦੀ ਅਗਵਾਈ ’ਚ 100 ਤੋਂ ਵੱਧ ਟਰੈਕਟਰ ਕਾਰ ਸੇਵਾ ’ਚ ਲੱਗੇ
100 ਏਕੜ ’ਚ ਹੜ੍ਹ ਨਾਲ ਫੈਲ ਗਈ ਸੀ ਰੇਤਾ ਤੇ 40 ਫੁੱਟ ਡੂੰਘੇ ਪੈ ਗਏ ਸੀ ਟੋਏ
ਸੁਲਤਾਨਪੁਰ ਲੋਧੀ, 24 ਸਤੰਬਰ
ਹੜ੍ਹ ਦੌਰਾਨ ਪਿੰਡ ਜਾਨੀਆ ਚਾਹਲ ’ਚ ਕਿਸਾਨਾਂ ਦੀਆਂ ਜ਼ਮੀਨਾਂ ਵਿਚ ਪਏ 40 ਤੋਂ 45 ਦੇ ਕਰੀਬ ਟੋਇਆਂ ਨੂੰ ਪੂਰਨ ਦਾ ਕੰਮ ਪੰਜਾਬ ਪ੍ਰਦੂਸ਼ਣ ਕੰਟਰੋਲ ਬੋਰਡ ਦੇ ਮੈਂਬਰ ਤੇ ਵਾਤਾਵਰਣ ਪ੍ਰੇਮੀ ਸੰਤ ਬਲਬੀਰ ਸਿੰਘ ਸੀਚੇਵਾਲ ਦੀ ਅਗਵਾਈ ਹੇਠ 100 ਤੋਂ ਵੱਧ ਟਰੈਕਟਰਾਂ ਦੀ ਮਦਦ ਨਾਲ ਸ਼ੁਰੂ ਕਰ ਦਿੱਤਾ ਗਿਆ ਹੈ। ਇਸ ਦੇ ਨਾਲ ਲਗਦੇ ਪਿੰਡ ਮਹਿਰਾਜ ਵਾਲਾ ਅਤੇ ਚੱਕ ਵਡਾਲਾ ਦੇ ਕਿਸਾਨਾਂ ਦੀਆਂ ਹੜ੍ਹ ਨਾਲ ਨੁਕਸਾਨੀਆਂ ਜ਼ਮੀਨਾਂ ਨੂੰ ਵੀ ਪੱਧਰਾ ਕਰਨ ਦਾ ਕੰਮ ਸ਼ੁਰੂ ਕੀਤਾ ਗਿਆ ਹੈ। ਇਨ੍ਹਾਂ ਪਿੰਡਾਂ ਦੇ ਕਿਸਾਨਾਂ ਦੀਆਂ ਜ਼ਮੀਨਾਂ ਹੜ੍ਹ ਕਾਰਨ ਬੁਰੀ ਤਰ੍ਹਾਂ ਨੁਕਸਾਨੀਆਂ ਗਈਆਂ ਸਨ। ਜ਼ਮੀਨਾਂ ਵਿਚ 5 ਫੁੱਟ ਤੋਂ ਲੈ ਕੇ 40 ਫੁੱਟ ਤੱਕ ਵੱਖ-ਵੱਖ ਥਾਵਾਂ ’ਤੇ ਟੋਏ ਪੈ ਗਏ ਸਨ ਅਤੇ ਦੂਰ ਤੱਕ ਹੜ੍ਹ ਨਾਲ ਮਿੱਟੀ ਤੇ ਰੇਤਾ ਖੇਤਾਂ ਵਿਚ ਫੈਲ ਗਿਆ ਸੀ। ਹੜ੍ਹ ਨਾਲ ਜਿਥੇ ਕਿਸਾਨਾਂ ਦੀ ਝੋਨੇ ਦੀ ਫਸਲ ਤਾਂ ਪੂਰੀ ਤਰ੍ਹਾਂ ਮਰ ਗਈ ਸੀ, ਉਨ੍ਹਾਂ ਨੂੰ ਕਣਕ ਬੀਜਣ ਦਾ ਫਿਕਰ ਵੱਢ-ਵੱਢ ਖਾਣ ਲੱਗ ਪਿਆ ਸੀ। ਕਿਉਂਕਿ ਜ਼ਮੀਨ ਪੱਧਰੀ ਕਰਨਾ ਉਨ੍ਹਾਂ ਲਈ ਵੱਡੀ ਚੁਣੌਤੀ ਬਣ ਗਿਆ ਸੀ। ਕਿਸਾਨਾਂ ਦੀ ਜ਼ਮੀਨ ਪੱਧਰੀ ਕਰਨ ਲਈ ਫਰੀਦਕੋਟ, ਲੁਧਿਆਣਾ, ਮੋਗਾ, ਜਲੰਧਰ, ਕਪੂਰਥਲਾ, ਕਾਲਾ ਸੰਘਿਆਂ, ਸਿੱਧਵਾਂ ਦੋਨਾ ਤੇ ਹੋਰ ਇਲਾਕਿਆਂ ਤੋਂ ਕਿਸਾਨ ਟਰੈਕਟਰ ਲੈ ਕੇ ਆਏ ਹੋਏ ਸਨ। ਟੋਏ ਪੂਰਨ ਲਈ ਦੋ ਜੇਸੀਬੀ ਮਸ਼ੀਨਾਂ ਵੀ ਲੱਗੀਆਂ ਹੋਈਆਂ ਸਨ। ਕਿਸਾਨਾਂ ਵੱਲੋਂ ਰਲ ਕੇ ਹੀ ਟਰੈਕਟਰਾਂ ਵਿਚ ਤੇਲ ਪੁਆਇਆ ਜਾ ਰਿਹਾ ਸੀ।
ਜਾਨੀਆ ਚਾਹਲ ਦੇ ਕਿਸਾਨ ਮੇਜਰ ਸਿੰਘ ਨੇ ਦੱਸਿਆ ਕਿ ਉਨ੍ਹਾਂ ਦੇ ਪਿਤਾ ਭਜਨ ਸਿੰਘ ਆਪਣੇ ਚਾਰ ਭਰਾਵਾਂ ਨਾਲ ਸਾਂਝੇ ਤੌਰ ’ਤੇ ਰਹਿੰਦੇ ਹਨ ਤੇ ਇਕੱਠੇ ਹੀ ਖੇਤੀ ਕਰਦੇ ਹਨ। ਉਨ੍ਹਾਂ ਦੀ 18 ਏਕੜ ਦੇ ਕਰੀਬ ਜ਼ਮੀਨ ਹੈ। ਇਸ ਵਿਚੋਂ ਚਾਰ ਏਕੜ ਵਿਚ ਹੜ੍ਹ ਨਾਲ 5 ਫੁੱਟ ਤੋਂ ਲੈ ਕੇ 45 ਫੁੱਟ ਤੱਕ ਡੂੰਘੇ ਟੋਏ ਪੈ ਗਏ ਸਨ। ਕਿਉਂਕਿ ਜਿਥੋਂ ਧੁੱਸੀ ਬੰਨ੍ਹ ਟੁੱਟਿਆ ਸੀ ਉਸ ਤੋਂ ਅੱਗੇ ਉਨ੍ਹਾਂ ਦੀ ਹੀ ਜ਼ਮੀਨ ਆਉਂਦੀ ਸੀ। ਤੇਜ਼ ਪਾਣੀ ਦੇ ਵਹਾਅ ਨੇ ਉਨ੍ਹਾਂ ਦੀ 4 ਏਕੜ ਜ਼ਮੀਨ ’ਚ ਵੱਡੇ ਪੱਧਰ ’ਤੇ ਖੋਰਾ ਲਾ ਦਿੱਤਾ ਸੀ। ਕਿਸਾਨ ਮੇਜਰ ਸਿੰਘ ਨੇ ਦੱਸਿਆ ਕਿ ਹੜ੍ਹ ਨਾਲ ਉਨ੍ਹਾਂ ਦਾ ਝੋਨਾ ਤਾਂ ਸਾਰਾ ਹੀ ਤਬਾਹ ਹੋ ਗਿਆ ਸੀ ਪਰ ਉਨ੍ਹਾਂ ਨੂੰ ਜ਼ਮੀਨ ’ਚ ਪਏ ਟੋਏ ਭਰਨੇ ਅਸੰਭਵ ਲੱਗਦੇ ਸਨ। ਉਨ੍ਹਾਂ ਕਿਹਾ ਕਿ ਇਨ੍ਹਾਂ ਟੋਇਆਂ ਨੂੰ ਭਰਨ ਲਈ ਨਾ ਤਾਂ ਉਹ ਏਨੇ ਟਰੈਕਟਰ ਲਿਆ ਸਕਦੇ ਸਨ ਤੇ ਨਾ ਹੀ ਏਨਾ ਡੀਜ਼ਲ ਫੂਕ ਸਕਦੇ ਸਨ।
ਫਰੀਦਕੋਟ ਤੋਂ ਆਏ ਇਕਬਾਲ ਸਿੰਘ ਅਤੇ ਸੁਖਦੇਵ ਸਿੰਘ ਨੇ ਦੱਸਿਆ ਕਿ ਉਨ੍ਹਾਂ ਨੇ ਸ਼ੋਸ਼ਲ ਮੀਡੀਏ ’ਤੇ ਸੰਤ ਬਲਬੀਰ ਸਿੰਘ ਸੀਚੇਵਾਲ ਦੀ ਅਪੀਲ ਨੂੰ ਸੁਣਿਆ ਸੀ, ਜਿਸ ਵਿਚ ਉਨ੍ਹਾਂ ਨੇ ਕਿਸਾਨਾਂ ਦੀਆਂ ਜ਼ਮੀਨਾਂ ਪੱਧਰੀਆਂ ਕਰਨ ਲਈ ਟਰੈਕਟਰ ਅਤੇ ਕਰਾਹਿਆਂ ਦੀ ਮੰਗ ਕੀਤੀ ਸੀ। ਉਹ 15 ਟਰੈਕਟਰਾਂ ਨਾਲ ਅੱਜ ਸਵੇਰੇ ਜਾਨੀਆ ਚਾਹਲ ਪਹੁੰਚ ਗਏ ਸਨ। ਇਕਬਾਲ ਸਿੰਘ ਨੇ ਦੱਸਿਆ ਕਿ ਉਨ੍ਹਾਂ ਦਾ ਸ਼ਾਮ ਨੂੰ ਮੁੜਨ ਦਾ ਇਰਾਦਾ ਵੀ ਸੀ ਪਰ ਕੰਮ ਵੱਡਾ ਹੋਣ ਕਾਰਨ ਉਨ੍ਹਾਂ ਨੇ ਉਦੋਂ ਤੱਕ ਰੁਕਣ ਦਾ ਫੈਸਲਾ ਕੀਤਾ ਜਦੋਂ ਤੱਕ ਜ਼ਮੀਨ ਪੱਧਰੀ ਨਹੀਂ ਹੋ ਜਾਂਦੀ।
ਮੋਗੇ ਦੇ ਪਿੰਡ ਕਪੂਰੇ ਤੋਂ ਆਏ ਗੁਰਸ਼ਰਨ ਸਿੰਘ ਨੇ ਦੱਸਿਆ ਕਿ ਉਹ ਆਪਣੇ ਸਾਥੀਆਂ ਨਾਲ ਹੜ੍ਹ ਦੌਰਾਨ ਜਾਨੀਆ ਚਾਹਲ ’ਚ ਬੰਨ੍ਹ ਲਾਉਣ ਲਈ ਵੀ ਆਏ ਸਨ, ਹੁਣ ਜਦੋਂ ਉਨ੍ਹਾਂ ਨੇ ਕਿਸਾਨਾਂ ਦੀਆਂ ਜ਼ਮੀਨਾਂ ਪੱਧਰੀਆਂ ਕਰਨ ਵਾਲੀ ਅਪੀਲ ਨੂੰ ਸੁਣਿਆ ਤਾਂ ਪਹਿਲਾਂ ਵਾਂਗ ਹੀ ਉਹ ਟਰੈਕਟਰ ਲੈ ਕੇ ਆਏ ਸਨ।
ਵਾਤਾਵਰਣ ਪ੍ਰੇਮੀ ਸੰਤ ਬਲਬੀਰ ਸਿੰਘ ਸੀਚੇਵਾਲ ਨੇ ਦੱਸਿਆ ਕਿ ਅੱਜ ਸਵੇਰੇ ਕਿਸਾਨਾਂ ਦੀਆਂ ਜ਼ਮੀਨਾਂ ਪੱਧਰੀਆਂ ਕਰਨ ਦਾ ਕੰਮ ਸ਼ੁਰੂ ਕਰ ਦਿੱਤਾ ਸੀ। ਉਨ੍ਹਾਂ ਦੱਸਿਆ ਕਿ ਪੰਜਾਬ ਦੇ ਵੱਖ-ਵੱਖ ਜ਼ਿਿਲ੍ਹਆਂ ਤੋਂ ਲੋਕ ਟਰੈਕਟਰ ਟਰਾਲੀਆਂ ਤੇ ਕਰਾਹੇ ਲੈ ਕੇ ਆਏ ਹਨ ਤਾਂ ਜੋ ਕਿਸਾਨਾਂ ਦੀ ਜ਼ਮੀਨ ਪੱਧਰੀ ਕਰਕੇ ਕਣਕ ਦੀ ਬਿਜਾਈ ਲਈ ਤਿਆਰ ਕੀਤੀ ਜਾ ਸਕੇ। ਜਾਨੀਆ ਚਾਹਲ ਦੇ ਸਰਪੰਚ ਜਸਕਰਨ ਸਿੰਘ ਨੇ ਦੱਸਿਆ ਕਿ 100 ਏਕੜ ਦੇ ਰਕਬੇ ਵਿਚ ਹਲ ਨਾਲ ਰੇਤਾ ਫੈਲ ਗਈ ਸੀ ਅਤੇ ਨਾਲ ਲਗਦੀ ਜ਼ਮੀਨ ’ਚ ਟੋਏ ਪੈ ਗਏ ਸਨ। ਉਨ੍ਹਾਂ ਨੂੰ ਪੂਰਨ ਦਾ ਕੰਮ ਵੱਡੀ ਪੱਧਰ ’ਤੇ ਸ਼ੁਰੂ ਕੀਤਾ ਗਿਆ ਹੈ।